Үзән
+29 °С
Ачык
Барлык яңалыклар
Авыл биләмәләрендә
9 октябрь 2020, 11:44

Авылларны төзекләндерү – гомум хәстәрлек

Елдан-ел авылларыбызның йөзе үзгәрә, күркәмләнә. Кече туган ягыбызны төзекләндерү – авыл биләмәсе хакимиятенең генә түгел, анда яшәүче һәр кешенең изге бурычы.

Сугыш яугирләре турында истәлек
Сарт-Науруз халкы моны яхшы аңлый һәм авыл турында даими хәстәрлек күрә. Биредә төп халык яши, элек аларның ата-бабалары авылга нигез салган. Бәлки, шуның өчен дә һәр нәрсәнең кадерен беләләр. Үзләренең генә йортын түгел, аннан читтә дә төзекләндерү һәм күркәмләндерүне – үзлә­ренең бурычы дип исәплиләр. 2018 елның 8 маенда авыл халкының тырышлыгы белән “Дан обелискы” мемориал комплексы барлыкка килде. Аның башлангычында Илдар Зәй­нуллин, Наил Котлыяров, Руслан Котлыяров, Наил Равилов һәм фронтовик Тәкыйулла Әми­нев тора. Тәкыйулла Кә­ли­мулла улы бүгенге көндә мәрхүм инде. Ләкин вакытында Граж­дан­нар, Беренче Бөтендөнья һәм Бөек Ватан сугышларында катнашкан якташ­ларының исем­леген нәкъ ул төзегән. Хәтер тактасында 1757 елдан башлап сугышта катнашкан сартнаурузлыларның исем­нәре уелып язылган. Шулай авылның репрессиягә эләккән кешеләре, тыл эшчәннәре һәм сугыш балалары турында да онытмаганнар. Якташ моряклар хөрмәтенә 1862 елда чүкеп ясалган чын адмирал якоре, Бөек Ватан сугышы яулары барган урындагы җир салынган капсула куелган.
Кагыйдә буларак, туган авыл­ларын төзекләндерү мәсь­әләләре һәм бурычлары имам-хатыйп Руслан хәзрәт, авыл Советы депутаты Флюр Яхшыголов, зиратларны тоту буенча җаваплы Рәлиф Ракимов, Салих Котлыяров, Фәнил Антын­бә­ков, авыл активистлары Наил Ра­вилов, Илдар Зәйнуллин, авыл аксакалы Мидхәт Котлыяровтан торган аксакаллар корында, шулай ук гражданнар җыенында җентекле тикшерелде һәм эш күләме билге­ләнде.
- Бездә авыл өчен янып-көй­гән актив һәм тырыш кешеләр яши. Алар акчасын да җыя, төзи, буйый, ремонтлый һәм тәртипкә дә китерә, - ди урындагы мәчетнең имам-хатыйбы Руслан хәзрәт Котлыяров. – Менә, мәсәлән, Урал урамында яшәүчеләр киңәшл­әшеп, балалар өчен уен мәй­данчыгы төзеп куйдылар.
- Тәүдә без бу турыда авыл биләмәсе хакимиятенә хәбәр иттек. Безгә уен мәйданчыгын коймалап алырга кирәклеген әйттеләр. Бу мәсьәләне без озакка сузмаска карар иттек һәм күрше-күлән белән җыелышып коймалап та куйдык. Ә эскәмия, таган һәм спорт комплексын авыл биләмәсе хакимияте сатып алды. Хәзер бу мәйданда иртә­дән кичкә кадәр балаларның шатлыклы тавышлары ишетелеп тора. Алар саф һавада рәхәт­ләнеп уйныйлар, вакытларын файдалы үткәрәләр, - ди төзе­леш инициаторының берсе Алия Котлыева.
Коелар ремонтлана
Хәзер авыл халкы узган гасырның 70нче елларында ук казылган коеларны ремонтлау һәм чистарту белән мәшгуль. Элек барсы да суны шуннан алган.
- Хәзер барлык йортта да диярлек су скважиналары, насос һәм коелары бар. Ә электр уты сүнгәндә халык сусыз этләнә. Шуның өчен дә аксакаллар корында без коеларны ремонтларга кирәк, дигән карарга килдек. Тәкъ­димне һәркем хуплады. Әле­­­ге көндә биш коеның дүрте­сендә ремонт эшләре тәмам­ла­нып килә. Биредә коелар ны­­гы­тылды, япма эшләнде, ко­й­­малап алынды. Аларның һәр­бер­­сенә Миңлехаҗи, Гай­не­камал, Сәлимҗан, Сөләй­ман дип, элек кое янында яшәгән, аны тәртиптә тоткан, авыл өчен бик күп изге эшләр башкарган актив кешеләрнең исемнәре бирелде. Бишенче коены “Изгеләр коесы” дип атадык, - ди авыл активистларының берсе Наил Равилов.
Шулай ук Наил Сәйфел­галим улы билгеләвенчә, авыл халкы күптән йортларына су үткәрергә хыяллана. Аларның һәрберсенең йортында су скважинасы булуга карамастан, андагы су каты, дип белдерде. Ә ул кеше сәламәтлеге өчен хәвефле. Урамга төп торба берничә ел элек үк салынган булган, аны йортларга һәм тыкрыкларга сузасы гына калган. Бу проект белән алар ике ел рәттән Урындагы башлангычларны хуплау программасында катнашканнар, ләкин тиешле баллны җыя алмаганнар. Агымдагы елда алар янә бу тәкъдим белән чыгыш ясарга җыеналар, бу юлы аларга бәхет мотлак елмаячак, дип ышанабыз.
Светлана Карпова.
Читайте нас: