Үзән
+29 °С
Ачык
Барлык яңалыклар
Авыл биләмәләрендә
6 гыйнвар 2021, 17:15

Рәхмәт әйтеп шуалар

Яңа ел алдыннан Иске Акташ авылында күркәм тау барлыкка килүе турында язып үткән идек инде. Мондый бүләк шушы авылда туып-үскән, бүген дә анда гомер гомер итүче Илдус Мортазинның иганә ярдәме һәм авыл халкының көче белән мөмкин булды.

Хәзер Әпәс күле янындагы бу таудан кеше өзелми. Ул иртәннән алып караңгы төшкәнче балаларның шатлыклы авазларыннан шау-гөр килеп тора. Яңа ел бәйрәмнәре уңаеннан биредә аеруча күңелле. Көннең буе бала-чага тау шуса, кичләрен урындагы клуб мөдире Наилә Фәхретдинова күл өстендә урнаштырылган күркәм чыршы янында мәдәни чаралар, шул исәптән ретро-дискотекалар оештыра.
Шунысын да билгеләп үтәсе килә, бу тау турында ишетмәгән-белмәгән кеше калмагандыр – бирегә районыбызның төрле авылларыннан киләләр. Шәһәрдән кайтучылар да аны мактап туя алмый: ул киң дә, биек тә, уңайлы да...
- Каникуллар чорында балаларны еш кына тауга йөретәбез. Кичә Уфага барып килгән идек. Ләкин мондагы тауга җитми. Моны төзүчеләргә рәхмәт яусын инде, - ди Шәйморатов авылыннан килүчеләр.
Әйе, Әпәс күлендәге тау – авылга гына түгел, барлык район халкына хезмәт итә. Иң мөһиме, бирегә килүчеләрнең һәммәсе аны төзүчеләргә зур рәхмәт әйтеп шуа. Ә бер рәхмәт мең бәладан коткара, ди...
Эльвира Ямалетдинова.
Автор фотолары.
Читайте нас: