Моксин авылы халкы җиңүгә ышана

 Авыл биләмәсенең Сәвәләй авыл Советы башлыгы Тимур Галәветдинов Программада катнашу кагыйдәләре һәм нинди проектларны тормышка ашыру турында сөйләде. Авыл халкы әлеге конкурста катнашу турында карар кабул итте. Алга таба сайлап алуда катнашу өчен беренче чираттагы проблеманы сайладылар. Моксинлылар шулай ук проектны билгеләүдә һәм сайлауда битараф калмады. Үсеп килүче буын арасында тарихи хәтерне саклауның һәм патриотизмны тәрбияләүнең мөһимлеген тикшергәннән соң, авыл халкы, "Ватанны саклаучыларны искә алу урыны" проекты белән “Урындагы башлангычларны хуплау – 2025” программасында катнашачак, дип карар иттеләр. Аның өчен күпчелек тавыш бирелде. Тавыш бирү юлы белән инициатив төркем сайланды. Аңа Зинира Ришат кызы Моратова (рәис), Риф Лотфулла улы Мөхәммәткулов, Винера Рафаил кызы Сәйфетдинова, Зимфира Харис кызы Галиева, Бибиямал Миңнебай кызы Әһлиуллина керде.

Заявка җиңгән очракта, алар эшләрне алып бару барышын контрольдә тотачак, проектны уртак финанслау чикләрендә халыктан акча җыю белән шөгыльләнәчәк. Шулай ук, һәр хуҗалыктан 1000әр сум җыярга карар ителде. Моннан тыш, экономия очрагында, акчаларны тотыну турында да карар кабул иттеләр.

Исегезгә төшерәбез, “Урындагы башлангычларны хуплау – 2025” программасы республика һәм муниципаль бюджетларның финанс ресурсларын, физик һәм юридик затлар акчаларын берләштерергә һәм аларны социаль әһәмияткә ия проблемаларны хәл итүгә юнәлдерергә мөмкинлек бирә торган механизм ул.

Галия САДЫЙКОВА.